زمان أيام الفرحة

زمان لما كنت صغيرة قصدي لما كنت حرة معنديش مسئوليات من أي نوع كنت مبسوطة أوي دلوقتي أنا مبحسش أني حرة في أي حاجة و لا في لبسي و لا في وقتي و لا حتى في تعبيري عن مشاعري عايزة ألبس اللي أنا عايزة و أعمل اللي أنا مقتنعة بي عايزة أشتغل و أخرج و أتفسح عايزة أعيش بطريقتي بس معنديش الشجاعة إني أتحمل العواقب طول عمري مذبذبة ما بين أني بدور على الأمن والأستقرار و ما بين إحتياجي الداخلي للشعننة

عايزة شورت وفانلة وشبشب أمشي بيهم على البحر و أنا بغني بصوت عالي (يا حلاوة الدنيا يا حلاوو يا حلولو يا حلاوة)

حماة الشر

ناس كتير بتحب تحمي الشر و الشر قصدي يعني الغلط الناس بتحب تحمي الإهمال و تداري عليه تفتكروا ليه هل لأنهم متواطئين في جزء منه ممكن كمان يكونوا بيحبه يحسوا أنهم مش هما لوحدهم اللي وحشين لا ده كل الناس كده حاسه انكم مش فهمني و لو اني مبقولش كلام غريب بس عارفين أنا عندي 30 سنة و لسة شايفة الدنيا بعيون عيل فى أولى أول فاكر إن الناس كلها حلوين و مصدق إن الأبلة حتجيبله حقه من زميله اللي ضربه في الفسحة و زقه ووقعه و عوره تفتكره الأبلا حتعمل أيه حتقول للولد أنت شقي و مش مؤدب متعملش كدة تاني طيب و العيل اللي اتعور يالا علقة تفوت و لا حد يموت و أهي ماشية و يبقى الواد الشقي كمان كام يوم يضرب عيل تاني و نقول معلش أصله واد عفريت عموما الواطي حيفضل و اطي و عمر حالنا محيتعدل طول ما إحنا مبنحبش الحق بس و حياة الأبلة إن الاد اغلبان الطيب ما حيسكت عن حقه المرة دي...................... باي باي

عايزة أحكيلكم عن اللي حصلي يوم 14/4/2008 و أنا راجعة من شغلي في عربية الشركة مع سواق الشركة وفي مواعيد العمل الرسمية السواق جاتله حالة غيبوبة مصاحبة بتشنج من نص الطريق تقريبا و صحبتكو كانت قاعدة مش فاهمة ماله مانا معنديش فكرة عن أنه عيان و لا حاجة بس و فضلت العربية الطايشة ماشية علطول و بتجري لأن رجله تقلت على البنزين و بعدين طبعا عملنا حادثة و دخلنا في مقطورة و سبحان الله طلعت بس ب6 غرز في وشي و السواق طلع سليم مع أن كل اللي يشوف العربية يقول استحالة اللي كانوا فيها سلام الحمد لله .المهم اللي بعد كدة الشركة مدتش اهتمام لحاجة واكتفت ب 2 كيلو شكولاتة و حزمة ورد و كارت اه نسيت أقالكو اللي عرفته بعد كده أن السواق مريض بهذه التشنجات و مش أول مرة تحصلوا و الشركة كمان كانت عارفة بس الظاهر كانوا عايزين يخلصوا مني و منه الكارثة الكبيرة أني قلت يا بت بلاش تعملي مشاكل و لا تقاضيهم و لا تعملي حاجة بس و رجعت الشغل بعد الأجازة أقولهم الأجازة دي حتكون أيه يقوللي مرضي أمال فين إصابة العمل يقوللي أصل إحنا مخدناش بالنا و كان المفروض نعملهالك من الأول و خلاص دلوقتي مش حينفع معلش بأه إهمال للمرة التانية مرة كنا حنموتك مش قصدنا و الله و المرة التانية حنديكي على أفاكي و الله ما نقصد مهملين بقى يالا خليها عليكي تفتكروا اسكت و لا اية و لا ابكي على نفسي أنتو عارفين إحساس أنك تشوف نفسك راكب في عربية وحتعمل حادثة من قبل الحادثة بكتير و لا إحساس أن ملكش قيمة يا سلام و الله أنا محتجالكو أوي ردوا علي باي

هاي أذيكم ميرسي لكل اللي بعتولي تعليقات حقيقي رجعتولي الأمل و أنا اللي كنت فكرت مكتبش حاجة تاني و قولت ده أكيد موضوع فاشل

مش مبسوطة

أنا زهفانة و عارفة لية علشان المكنة اللي دايرة ومش حتقف إلا لو أنا وقفتها أو وقفت لوحدها قدرياً زهقانة من الكلام مع الناس و زهقانة من سماع كلامهم و زهقانة من سكوتي اللي عمره ما نطق و اللي بتمنى أنه ينطق زهقانة من دموعي اللي محبوسين و من صوتي الأخرس زهقانة من نفسي و من ا لناس اللي حوالي و اللي ميعنونيش في حاجة بس لازم اتعامل معاهم و الناس اللي بيعنوني أوي و اللي مش عارفة الاقيهم زهقانة من قلة حيلتي.عايزة ألعب لعبة حلوة
باي كفاية كدة

تفتكروا الناس بتكتب لبة على المدونات الألكترونية لية نكتب اللي جوانا على المدونة و ننشره لكل الناس اللي منعرفهمش و نخليهم يقرونا و يقروا اللي جوانا و نكتبلهم اللي يمكن بنداري عن أقرب الناس لينا حاجة غريبة ازاي بنثق في الناس اللي منعرفهممش عارفين أنا مش شايفة غير مبرر واحد للحكاية دي بالنسبة لي يمكن أكون مش عايزة اصطدم بحد فبحس أنه أقول اللي عايزة أقوله في الهوا أيوه الهوا أكتب و ملقاش رد مباشر على اللي بكتبه الرد بيجي بعد فترة يكون الواحد قال اللي في نفسه تفتكروا اللي اخترع نظام البلوجز ده اخترعوا ليه متهيألي عشان يعرق كل واحد جواه أيه لئيم قوي بتاع البلوجز ده و إحنا أكيد عارفين كده بس برضه بنسمحله يتلصص علينا أصلاً يعني إحنا قصدي يعني بني البشر غرب غرابة يا راجل و بنعمل تصرفات ربنا وحده هو اللي يعلم بنعمل كده ليه ربنا بس هو اللي يعلم مش الراجال اللئيم بتاع البلوجز عارفين البوجات دي بتفكرني بالفيلم بتاع ( ترومان شو ) واحد عمل لواحد حياة وقعد يتفرج علية لا مش بس كدة ده كمان بأى هو اللي بيتحكم في حياته ومش بس كده ده خلاه فرجه لكل النا مش برضة الموضوع ده شبه اللي بيحصل في البلوجات عايزة رأيكم في الموضوع ده متبعتولي أنتوا مبتبعتوليش ليه.

كل يوم خميس الواحد بيبقى صاحي من النوم فرحان لا دا انا ببقى فرحانة قبلها بيوم تقولش يعني في يومين الإجازة حقطع الدنيا خروج و فسح و هيصة و فرحة تقولش العيد و لو أني نادر ما ندر مبعمل حاجة من دول اللي هو بالكتير الواحد يقعد قدام التلفزيون – نعمة برضه- متهيئلي كل الناس من الكبير للصغير بيحبوا يوم الخميس حتى الأفراح بتبقى في اليوم ده و أغاني الأفراح برضة (يا و لاد بلادنا يوم الخميس حكتب كتابي و أبقى عريس) و الواحد بقى حينام براحته يا ريس . كل ده كلام فارغ بس مفيش أحلى من الكلام الفارغ يوم الأجازة بس ربنا يستر و ميحصلش نكد من بتاع المجوزين و يبقى دندرة و يضيع اليوم في نتصالح و لا نتخاصم
و النبي ما في أحلى من روقان البال إنما تقول أيه البني آدم إن ملقاش حاجة يلت فيها ميرتحش
شوفوا أنا قاعدة أرغي معاكم في الكلام ده و ناسية خالص اوصفلكم المكان اللي ببص عليه شوفوا بقى صلوا بينا على النبي عليه الصلاة و السلام بأى أنا قدامي منظر جميل جداً على البحر معتقدش ناس كتير بيكون قدامهم المنطر ده وهما في الشغل أنا بقى قدامي بحر و زرع و مراكب لكن مش عارفة ليه مبستمتعش بيهم أوي يمكن عشان في الشغل ده أنا حتى قليل مببص على البحر من هنا لكن لو قاعدة برة الشغل بموت كده في البحر شئ غريب إن نفس الحاجة الحلوة الممتعة تتغيرنظرتي ليها نظراً لتغير الظروف المحيطة و لو اني بفكر إن الأزاز اللي بيفصلني عن البحر ليه دور كبير في تغيير إحساسي بيه متهيألي لو شلت الإزاز ححس إحساس أفضل بقولكوا أيه كفاية رغي كدة و أروح أتفرج على البحر شوية أوطبعا أكيد حاجة في الشغل حتقطع علية الإستمتاع يالا ( .(C'est la vie

أول مروة

عارفين انا حاسة بأية حاسة اني عايزة أمشي فري من غير ميكون ورايا حاجة و امشي مع صاحبة بحبها وحشتني اوي هي مش واحدة معينة لكن واحدة من صاحباتي اللي كنت برتاح معاهم و اللي مبقتش أشوفهم بسبب مشغولياتي و مشغولياتهم . مش عايزة اتكلم عن الحاجة اللي بتضايقني لأني all ready دايما فاكرها لكن عايزة اتكلم عن الحاجة اللي نفسي أعملها أنا كنت زمان بحس طول الوقت في الشتا يعني أني بردانة دلوقتي دايما بحس بالحر تفتكروا ده أيه سببه أنا عايزة أتفاعل مع ناس بحبهم مش بتجبرني الحياة على التعامل معاهم عايزة امشي في الشارع اتمختر تصوروا انى عمرى متمخترت قبل كدة بس كنت زمان بمشي لوحدي ساعات و اسمع خطواتي مش عارفة لية كنت بحب اسمع صوت مشيتي دلوقتي بمسمعهاش خالص لأني مبقتش امشي بقيت يا راكبة يا بجر في نفسي.أنا عايزة أٌكون نفسي.
دي اول مرة أكتب في المدونة.